ആരായിരിക്കും എസ് എന്‍ സ്വാമി സംവിധാനം ചെയ്യുന്ന ചിത്രത്തിലെ നായകന്‍ ? മോഹന്‍ലാലോ മമ്മൂട്ടിയോ ?

              കുറ്റാന്വേഷണ കഥകളുടെ രാജാവാണ് എസ് എന്‍ സ്വാമി. വ്യത്യസ്തമായി ചിന്തിക്കുന്ന ഒട്ടേറെ കുറ്റാന്വേഷകരെ കഥാപാത്രങ്ങളായി സൃഷ്ടിച്ച് വിസ്മയിപ്പിച്ചിട്ടുണ്ട് സ്വാമി പലപ്പോഴും. സേതുരാമയ്യര്‍, പെരുമാള്‍ തുടങ്ങിയവ ഉദാഹരണം. മലയാള സിനിമയില്‍ ആദ്യത്തെ ലക്ഷണമൊത്ത ‘ഡോണ്‍’ സാഗര്‍ എലിയാസ് ജാക്കിയെ സൃഷ്ടിച്ചതും സ്വാമിയുടെ തൂലിക തന്നെ.നാല്‍പ്പതോളം സിനിമകള്‍ക്ക് തിരക്കഥയെഴുതിയിട്ടും എസ് എന്‍ സ്വാമി ഇതുവരെ ഒരു ചിത്രം സംവിധാനം ചെയ്തിട്ടില്ല. രണ്ടു സിനിമകള്‍ക്ക് തിരക്കഥയെഴുതിയാലുടനെ സംവിധായകക്കുപ്പായം അണിയാന്‍ മോഹിക്കുന്നവരുടെ നാട്ടില്‍ സ്വാമി തീര്‍ത്തും വ്യത്യസ്തന്‍. എന്നാല്‍ ഇപ്പോള്‍ ഒരു ചിത്രം സംവിധാനം ചെയ്യാനുള്ള ഒരുക്കത്തിലാണ് അദ്ദേഹം. കുറ്റാന്വേഷണ സിനിമ തന്നെയായിരിക്കും ഇത്.ആരായിരിക്കും എസ് എന്‍ സ്വാമി സംവിധാനം ചെയ്യുന്ന ചിത്രത്തിലെ നായകന്‍? സേതുരാമയ്യരെയും പെരുമാളിനെയും തനിക്ക് സമ്മാനിച്ച സ്വാമിയുടെ ആദ്യ ചിത്രത്തില്‍ നായകനാകാന്‍ മമ്മൂട്ടി ആഗ്രഹിക്കും എന്നത് ഇറപ്പാണ്. സാഗര്‍ എലിയാസ് ജാക്കിയെയും ബാബാ കല്യാണിയെയും അര്‍ജ്ജുനെ(നാടുവാഴികള്‍)യും തനിക്ക് നല്‍കിയ എഴുത്തുകാരനോട് മോഹന്‍ലാലിനും പ്രിയം കൂടും.എന്നാല്‍ തന്‍റെ നായകന്‍ ആരായിരിക്കുമെന്ന് എസ് എന്‍ സ്വാമി ഇനിയും വ്യക്തമാക്കിയിട്ടില്ല. ഉടന്‍ തന്നെ സ്വാമി തന്‍റെ ചിത്രത്തിന്‍റെ വിശദാംശങ്ങള്‍ ഔദ്യോഗികമായി പ്രഖ്യാപിക്കുമെന്ന് പ്രതീക്ഷിക്കാം.